اِذَا

الشَّمْسُ

كُوِّرَتْ

۟

جب سورج لپیٹ لیاجائے گا۔

اور جب ستارے ماند پڑجائیں گے۔

اور جب پہاڑ چلادیے جائیں گے۔

اور جب گابھن اونٹنیاں چھٹی پھریں گی۔

اور جب وحشی جانور جمع کردیے جائیں گے۔

اور جب سمندر دہکا دیے جائیں گے۔

اور جب جانوں کے جوڑ ملائے جائیں گے۔

اور جب زندہ دفن کی گئی لڑکی سے پوچھا جائے گا۔

کہ وہ کس گناہ کی پاداش میں قتل کی گئی تھی ؟

اور جب اعمال نامے کھول دیے جائیں گے۔

اور جب آسمان کی کھال اتار لی جائے گی۔

اور جب جہنم دہکائی جائے گی۔

اور جب جنت قریب لے آئی جائے گی۔

(اُس دن) ہر جان جان لے گی کہ اس نے کیا کچھ حاضر کیا ہے۔

تو نہیں ! میں قسم کھاتا ہوں پیچھے ہٹنے والے چلنے والے

اور چھپ جانے والے ستاروں کی۔

قسم ہے رات کی جب وہ روانہ ہونے لگے۔

اور صبح کی جب وہ سانس لے۔

یقینا یہ (قرآن) ایک بہت باعزت پیغامبر کا قول ہے۔

جو (جبرائیل) بہت قوت والا ہے صاحب ِعرش کے نزدیک بلند مرتبہ ہے۔

جس کی اطاعت کی جاتی ہے اور وہ امانت دار بھی ہے۔

اور تمہارے یہ ساتھی (محمد ﷺ کوئی مجنون نہیں ہیں۔

اور انہوں نے دیکھا ہے اس کو کھلے افق پر۔

اور وہ غیب کے معاملے میں حریص یا بخیل نہیں ہیں۔

اور یہ کسی شیطانِ مردود کا قول نہیں ہے۔

تو تم کدھر چلے جا رہے ہو ؟

نہیں ہے یہ مگر تمام جہان والوں کے لیے ایک یاد دہانی۔

ہر اس شخص کے لیے جو تم میں سے سیدھے راستے پر چلنا چاہے۔

اور تمہارے چاہے بھی کچھ نہیں ہوسکتا جب تک کہ اللہ نہ چاہے جو تمام جہانوں کا ربّ ہے۔